Արխիվ

160 ԹԱՏԵՐԱՇՐՋԱՆ

160-րդ թատերաշրջանը Գյումրու դրամատիկականի համար  երկար ու հարուստ ճանապարհի կարևոր էջն է՝ լի նոր ստեղծագործական մտահղացումներով, բեմական հանդիպումներով և թատերական նոր պատմություններով:
  Հոբելյանական՝ 160-րդ թատերաշրջանը ազդարարվեց Անահիտ Աղասարյանի «Երեք անունով մի աղջիկ» ներկայացմամբ՝ բեմադրության հեղինակ, ՀՀ ժողովրդական արտիստ, պրոֆեսոր  Նիկոլայ Ծատուրյանի ստեղծագործական ձեռագրով։ Թատերաշրջանի մեկնարկը կրկնակի հոբելյանական խորհուրդ ստացավ՝ Նիկոլայ Ծատուրյանի ծննդյան 80-ամյա տարեդարձով։
  Թատերաշրջանի բացումը նշանավորվեցթատրոնի 160-ամյակին նվիրված «Արտիստիկ համերգ» շոու-ներկայացմամբ, որտեղ թատրոնն իր սիրելի հանդիսատեսին ներկայացավ յուրահատուկ ձևաչափով: Տոնը նշանավորվեց՝ «Ֆոլկաստիկ բենդ»-ի մասնակցությամբ, որը հանդիսատեսին պարգևեց բարձր տրամադրություն և գունեղ երաժշտական պահեր: Ներկայացման ռեժիսոր՝ Ռաֆայել Ասատրյան: 160-րդ հոբելյանական միջոցառումների շրջանակում ներկայացվեց նաև թատրոնի գործունեությանը նվիրված «160 ակնթարթ» խորագիրը կրող ֆոտոալբոմը:
  Շարունակելով իր հոբելյանական տարին, Գյումրու դրամատիկական թատրոնընոյեմբերին Ղազախստանի Կոստանայ քաղաքի Ի.Օմարովի անվան ղազախական դրամատիկական թատրոնում մասնակցեց «Qit Fest» անվամբ միջազգային փառատոնին, որտեղ ներկայացվեց՝ ազգությամբ լեհ, աշխարհահռչակ դրամատուրգ Սլավոմիր Մրոժեկի «Տունը սահմանին» ներկայացումը՝ արժանանալով փառատոնի հատուկ մրցանակին: Բեմադրության ռեժիսոր՝ Արտուշ Միքայելյան:
  Ամանորի առիթով թատրոնն իր պատանի հանդիսատեսի տոնական օրերը հիշարժան դարձրեց Աստրիդ Լինդգրենի «Երկարագուլպա Պեպպին» երաժշտական հեքիաթ-ներկայացմամբ: Բեմադրության հեղինակ՝ Հասմիկ Սուվարյան:
  Հաջորդիվ, թատրոնն իր հանդիսատեսի դատին հանձնեց՝ Գաբրիել Գարսիա Մարկեսի «Ամենասիրուն ջրահեղձը» այլաբանական պատմվածքի բեմադրությունը, որը կյանքն արժևորելու, միապաղաղ առօրյային վերջ դնելու, միասնական ու հոգատար դառնալու ուղերձ է հասարակությանը: Բեմադրությունը՝հրավիրյալ ռեժիսոր Արինա Արարատյանի: Սա մի նոր փորձ էր՝ թատերական լեզվով վերարտադրելու մարկեսյան մոգական ռեալիզմի նուրբ ու բազմաշերտ աշխարհը:
  Թատերաշրջանի կարևոր ձեռքբերումներիցդարձավ նաև Լեոնարդ Գերշի «Ընտրությունը՝ սեր» ներկայացումը, որը նուրբ ու հուզիչ պատմություն է ինքնության փնտրտուքի և զգացմունքների հաղթանակի մասին: Բեմադրությունը՝ թատրոնի երիտասարդ ռեժիսոր Նադեժդա Ավետիսյանի:
  Հոբելյանական թատերաշրջանի ընթացքում Գյումրու դրամատիկական թատրոնը ակտիվորեն շարունակեց իր հյուրախաղային գործունեությունը՝ եռօրյա հյուրախաղերով հանդես գալով մայրաքաղաքում և հանրապետության տարբեր մարզերում: