Արխիվ

155 ԹԱՏԵՐԱՇՐՋԱՆ

Գյումրու դրամատիկական թատրոնը նշում է իր 155-րդ հոբելյանը՝ հանդես գալով որպես նրա շարունակության կրողն ու գեղարվեստական ընկալումների ձևավորողը։ Թատրոն, որի կամարների տակ դեռ զգացվում է անցնող տասնամյակների ընթացքում այստեղ ստեղծագործած մեծանուն արվեստագետների շունչը։ Նրանց ոտնահետքերը հավերժ դրոշմված են այս բեմի վրա, և ներկայիս սերնդի համար մեծ պատիվ և պատասխանատվություն է նրանց գործը շարունակելը։ Թատերաշրջանը մեկնարկեց Բ. Զաքարյանի «Քեյս» ներկայացմամբ։ Բեմադրությունը և երաժշտական ձևավորումը՝ Լյուդվիգ Հարությունյանի, նկարչական ձևավորումը՝ Գարեգին Եվանգուլյանի, զգեստների նկարիչ՝ Լուսինե Խաչատրյան։ Դերերում՝ ՀՀ վաստակավոր արտիստ Տիգրան Գաբոյան, ՀՀ վաստակավոր արտիստ՝ Դիանա Մացոյան, ՀՀ վաստակավոր արտիստ՝ Հովհաննես Հովհաննիսյան, Արսեն Սաղաթելյան, Սարգիս Ղարիբյան, Գայանե Մանուկյան, Արկադի Ղարագուլյան, Արսեն Միքայելյան։
Հաջորդիվ, այս տարի հանդիսատեսի դատին կհանձնվի Բ. Զաքարյանի «Քայլեր» ներկայացումը։ Բեմադրությունը՝ Ասպրամ Բաղդասարյանի։
Լիահույս ենք, որ 155-րդ թատերաշրջանի ընթացքում Գյումրու դրամատիկական թատրոնն իր մոգական ուժով ափի մեջ կառնի սիրելի հանդիսատեսին՝ վերստին հաստատելով այն միտքը, որ թատրոնն այն վայրն է, որտեղ ամբոխը վերածվում է ազգի։